မနက်စောစော ရယ်စရာဟာသ သတင်းကြားရတယ်။ စစ်ကောင်စီက ကနေဒါအခြေစိုက် အစ္စရေးလော်ဘီ အဖွဲ့ကို ငှားပြီး နိုင်ငံတကာကို ဂျင်းကြွေးဖို့ ဒေါ်လာသန်းချီအကုန်ခံကြိုးစားနေပြီဆိုတဲ့သတင်း။

မျက်ဖြူဆိုက်လေ ဆရာကြိုက်လေ လော်ဘီကောင်ကလည်း ပွပေါက်တိုးပြီဆိုပြီးနင်းကန်တောင်းမှာပဲ။ 

ဘာတဲ့။ ပထမတစ်ချက်က ဒေါ်စုက တရုတ်ကြီးဘက်ကို သိပ်ကပ်သွားလို့ အာဏာသိမ်းရတယ်ဆိုပဲ။ အဲဒီမှာ ရယ်ရတာပဲ။ တရုတ်ကြီးတပည့်ကျော်တွေက ဘယ်သူတွေလဲဆိုတာ အားလုံးသိတဲ့ကိစ္စ။ ငပြူးတွေက ပြဲပြနေတယ်။ မြန်မာနိုင်ငံမှာရှိတဲ့ လက်နက်ကိုင်အဖွဲ့မှန်သမျှ တရုတ်လောင်းရိပ်မကင်းကြပါဘူး။ တရုတ်ကြီး ကလဖန်ထိုးသမျှအားလုံးခံနေကြရတာ။ 

တရုတ်က ဒေါ်စု ကို အသုံးချခဲ့တယ်ဆိုတာလည်း အမှန်ပါပဲ။ ဒေါ်စုကလည်း အသုံးချ ခံသင့်သလောက်ခံခဲ့တယ်ဆိုတာလည်း အမှန်။ ဒေါ်စုတို့ အစိုးရမဖြစ်ခင်ကတည်း က ပါတီခေါင်းဆောင်အနေနဲ့ ပီကင်းကို ဖိတ်ခေါ်ခဲ့တာတွေရှိသလို လက်ပံတောင်းတောင်ကိစ္စမှာလည်း ဒေါ်စုက တရုတ်ကြီးအတွက် အမိုက်ခံပြီး ဝင်ရှင်း မီးလောင်ဗုံးကို မီးခိုးဗုံးဖြစ်စေခဲ့တာတွေလည်း ရှိခဲ့တယ်။ ၂၀၁၉ ကချင် ခရီးစဉ်မှာတောင် ဒေါ်စုက မြစ်ဆုံဆည်ပြန်စဖို့ အတွက် ပြည်သူတွေ အမြင်ကျယ်ကြဖို့ဆိုပြီး စကားရိပ်သန်းခဲ့ဖူးတာတွေ မှတ်မိကြမှာပါ။ 

ဒါတွေဟာ ဘာကြောင့်လဲဆိုတော့ တရုတ်ဟာ ပထဝီနိုင်ငံရေးအရ အရေးပါလွန်းတဲ့ အိမ်နီးချင်းပါဝါကြီးတိုင်းပြည်ဖြစ်လို့ပါပဲ။ နီးရာဓား သဘောပေါ့။ တရုတ်နဲ့ သင့်အောင်တင့်အောင်ပေါင်းမှလည်း ပြည်တွင်းအင်အားတွေရဲ့ ချိန်ခွင်လျှာကို ညှိနိုင်မယ်ဆို ကစားခဲ့တာပဲ ဖြစ်မယ်။ 

အစ္စရေးလော်ဘီရဲ့ ထိုးနှက်တဲ့အကွက်ကတော့ ဒေါ်စု နဲ့ ဒီချုပ်ကို တရုတ်နဲ့ပေးစား ပြီး အမေရိကန် နဲ့ လှည့်တိုက်ပေးတဲ့ အကွက်ပါပဲ။ ဒါက ရယ်စရာပါ။ နိုင်ငံတကာဆက်ဆံရေးမှာ နိုင်ငံပလေယာအားလုံးဟာ ပုံစံအမျိုးမျိုးနဲ့ မိမိတိုင်းပြည်အကျိုးစီးပွားအတွက် ကစားနေကြရတာပါပဲ။ ဒါကို အမေရိကန် က မသိပဲမနေသလို သူကိုယ်တိုင်လည်း တရုတ်ကြီးနဲ့ အပေးအယူ အဖိအဖော့ အဆွဲအရုန်း နည်းမျိုးစုံနဲ့ ကစားနေရတာ။ တရုတ်နဲ့အမေရိကန်က ရန်သူဖြစ်နေသလို စီးပွားရေးမကင်းရာမကင်းကြောင်းတွေလည်း ဖြစ်နေပြန်တယ် ဆိုတော့ ကာ ဒီလို တရုတ်ကိုပြပြီး အမေရိကန်နဲ့လှည့်တိုက်ပေးတဲ့ အကွက်လောက်ကတော့ ဒေါ်လာသန်းချီပေးငှားရတာ မတန်လှဘူး ဆိုရမယ်။ ပြည်တွင်းဖြစ် ကိုကိုလှိုင်တို့ နေဇင်လတ်တို့တောင် အဲ့လောက်တော့လုပ်တတ်ပါသေးတယ်။ 

နောက်တစ်ကွက် ဘာတဲ့။ ရိုဟင်ဂျာကိစ္စမှာ ဒေါ်စုသည်သာ တာဝန်အရှိဆုံး အပြစ်အရှိဆုံး ဆိုပါလား။ ဒီကိစ္စမှာတော့ ဒေါ်စု တာဝန်မကင်းဘူး ဆိုတာကို လက်ခံတယ်။ ဒေါ်စု ဟာ နိုင်ငံရေးကစားကွက်တစ်ခုအတွက် လူ့အခွင့်အရေး နဲ့ လူသားဂုဏ်သိက္ခာတန်ဖိုးတွေကို ချနင်းခဲ့တယ်။ ဒီအတွက်လည်း ကျွန်တော်တို့ စိတ်နာကျည်းပြီး နိုးဗုတ်တွေဖြစ်ခဲ့ရတယ်။ သူလည်း ကမ္ဘာ့တံတွေးခွက်မှာ မျောလို့ ဆုတွေ တံဆိပ်တွေ အကုန်မြောင်းထဲရောက်ကုန်တာ အခုဆို နိုဗယ်ဆုရှင်တစ်ယောက်အဖမ်းခံထားရတာကို ဘယ်နိုဗယ်ဆုရှင် အဖွဲ့အစည်းကမှ ဆေးဖော်ကြောဖက်မလုပ်တော့တဲ့ အထိအောင်ဖြစ်ခဲ့ရပြီမဟုတ်လား။ ရိုဟင်ဂျာကိစ္စမှာ ဒေါ်စုဟာ သမိုင်းနဲ့ချီပြီး မှားတဲ့ဘက်မှာ ရပ်ခဲ့တယ် လူ့ဂုဏ်သိက္ခာကိုဖိနင်းတဲ့ဘက်မှာ ရပ်တည်လို့ အိုင်စီဂျေမှာတောင် စစ်အုပ်စုကို သွားကာကွယ်ရပ်တည်ပေးခဲ့သေးတဲ့မဟုတ်လား။ ဒီအတွက်တော့ ဒေါ်စုဟာ ဒီတစ်သက် နောင်တရရုံတင်မဟုတ် အရှက်ပါရနေရမှာ ဖြစ်တယ်။ 

ဒါပေမဲ့ သူ ခံလိုက်ရတာ မအူမလည်နဲ့ ကြားညှပ်တာမျိုးဖြစ်ပြီး လူသားတန်ဖိုးနဲ့ ပတ်သက်တဲ့ သစ္စာတရားတွေ တန်ဖိုးတွေအပေါ်မှာ ဘာတန်ဖိုးမှမရှိလှတဲ့ ကျပ်မပြည့်အာဏာလေးအတွက် သူ သစ္စာဖောက်မိခဲ့လိုပဲဖြစ်တယ်။ ဒါကြောင့် နယ်မြေရှင်းလင်းရေးဆိုတဲ့ စကားလုံးရဲ့ အတိမ်အနက်ကို မသိပဲ ကမ္ဘာ့လူပုံအလည်မှာ ဗိုက်ငှားပြီးဓားထိုးခံခဲ့တာပေါ့။ ဒီတော့ ကြွေးတင်ရင် ဘုရင်ဆပ်လိမ့်မယ်ဆိုတာမျိုး လက်နက်ကိုင်တွေလုပ်သမျှ ရမ်းသမျှကြမ်းသမျှဟာ အတိုင်ပင်ခံခေါင်းမှာချေးလာစုတော့တာပါပဲ။ သူ အ လို့ သူခံရတာလို့သာမှတ်ယူပါတယ်။ ဒီကိစ္စကိုတော့ မလည်ရှုပ်လုပ်ခဲ့တဲ့ ဒေါ်စုလည်း ကမ္ဘာကြီးနဲ့ ရှင်းရမှာ ဖြစ်ပါတယ်။

ချုပ်ပြောရရင်တော့ လော်ဘီတိုက်ကွက်က ဒေါ်စုကိုတရုတ်နဲ့ပေးစား ရိုဟင်ဂျာကိစ္စမှာ အပြစ်ပုံချပြီး တကယ်အပြစ်ကျူးလွန်သူတွေ လွတ်အောင်လုပ်တဲ့ အကွက်ပါပဲ။ ဒါဟာ မိုးကြိုး ကို ထန်းလက်နဲ့ ကာသလိုပါပဲ။ ပြည်သူတွေတောင်းဆိုတဲ့ ခြေဥဖျက်အသစ်ရေးခြင်းနဲ့ ဖယ်ဒရယ်ဒီမိုကရက်တစ်တိုင်းပြည်ထူထောင်လိုခြင်းတွေ နဲ့ ဒီကိစ္စတွေဟာ ဘာမှ မသက်ဆိုင်ပါဘူး။ ဒေါ်စုမှန်တယ် ဒေါ်စုမှားတယ် ဆိုတာတွေ ဟာ သမိုင်းတစ်ခေတ်မှာ ကျန်ရစ်ခဲ့ပါပြီ။ ရင်ကြားစေ့ရေးမူကိုပဲ ကိုင်စွဲခဲ့တဲ့ ဒေါ်စုနိုင်ငံရေးခေတ်ဟာ ကုန်ဆုံးသွားခဲ့ပြီးဖြစ်လို့ ဒီလော်ဘီပေးတဲ့ ဆင်ခြေတွေဟာလည်း မျက်မှောက်နိုင်ငံရေး အခင်းအကျင်းမှာ အဆံမပါတဲ့သင်္ကြန်အမြောက်လိုသာဖြစ်နေတယ်လို့ ခံစားမိပါတယ်ဗျာ။

https://www.facebook.com/744769315/posts/10159989297379316/