မီးတုတ်မရှို့ဘဲ သပိတ်မှောက်ကြမည့်သူများသို့

******************************************

ကျွန်တော်တို့ရဲ့ ရန်ကုန်တက္ကသိုလ်ကျောင်းသားများ သမဂ္ဂက တိုင်တဲ့ ကြွေးကြော်သံထဲမှာ “မီးတုတ် မီးတုတ် ရှို့ ရှို့” ဆိုတဲ့ ကြွေးကြော်သံ ပါပါတယ်။

မနေ့က တက္ကသိုလ်ထဲက ကမ္ဗည်းကျောက်တိုင်စိုက်အပြီး ထွက်လာတဲ့ အချိန်မှာ ဦးလေးတယောက်က ဒီ ကြွေးကြော်သံကို မတိုင်ဖို့ ၊ဒီကြွေးကြော်သံက အကြမ်းဖက်တဲ့သဘောဆန်ကြောင်း သူတို့အကွက်ထဲ ဝင်သွားမည်ဖြစ်ကြောင်း ရှင်းပြပါတယ်။

ညနေပိုင်းမှာပဲ အဲ့ဒီကြွေးကြော်သံ မတိုင်ဖို့ဆိုတဲ့ post တွေလည်း ခပ်စိတ်စိတ်တွေ့လာရလို့ ဒီကြွေးကြော်သံ အကြောင်းသိသလောက် ပြောပြချင်ပါတယ်။

ဒီကြွေးကြော်သံကို တို့ဗမာအစည်းအရုံးက စပြီးသုံးခဲ့တာပါ။၁၃၀၀ ပြည့်အရေးတော်ပုံ မှာလည်း ကြွေးကြော်ခဲ့ကြပါတယ်။ အဓိပ္ပါယ်ကတော့ ပညာဆိုတဲ့ မီးရှူးတန်ဆောင်ကြီးကို ရှို့ပြီး အရင်းရှင် ဓနရှင်တွေကို တော်လှန်ဖို့ နယ်ချဲ့တွေကို အမြစ်ပြတ်ချေမှုန်းဖို့ လုံးဝ လွတ်လပ်ဖို့ ပါ။တို့ဗမာအစည်းအရုံးရဲ့ တံဆိပ်မှာလည်း မီးရှူးကြီးကို ကိုင်ပြီး ချီတက်နေတဲ့ လူပုံကို ထင်ထင်ရှားရှားတွေ့ရမှာပါ။ဒိုင်အာခီနဲ့ ကျေနပ်မနေဘဲ “လုံးဝ လွတ်လပ်ရေးသာ ပထမ၊လုံးဝ လွတ်လပ်ရေးသာ ဒုတိယ၊ လုံးဝ လွတ်လပ်ရေးသာ အစစ” ဆိုပြီး ကြွေးကြော်ခဲ့တဲ့ တို့ဗမာအစည်းအရုံးရဲ့ နယ်ချဲ့ တော်လှန်ရေးနဲ့ အခု ၂၀၀၈ အောက်ကနေ ရွှေရည်စိမ် ဒီမိုကရေစီနဲ့ သာယာခဲ့ရာက လန့်နိုးပြီး ဖယ်ဒရယ်ဒီမိုကရေစီ စစ်စစ်ကို ရရှိဖို့၊အာဏာရှင်ကို မဟုတ်ဘဲ “အာဏာရှင်စနစ် “တခုလုံးကို အမြစ်ဖြတ်ဖို့ လှုပ်ရှားလာကြတဲ့ နွေဦးတော်လှန်ရေး သခင်များရဲ့ ရည်ရွယ်ချက်ဟာ ဆင်တူနေပါတယ်။ဒါကြောင့် ဒီကြွေးကြော်သံ ဟာ သုံးကို သုံးသင့်ပါတယ်။

ဝိုင်အမ်ဘီ သခင်တင် ရေးခဲ့တဲ့ “မီးဒုတ်သီချင်း” စာသားတွေကို ကြည့်ရင်လည်း ဒီမီးတုတ်ဟာ အရင်းရှင် ဓနရှင်တွေကို ရှို့မယ့် မီးတုတ် ၊အခုဆိုရင် အာဏာရှင်တွေကို ပြာဖြစ်အောင် ရှို့မယ့် မီးတုတ် လို့ အဓိပ္ပါယ်ရပါတယ်။ ဒီပညာဆိုတဲ့မီးတုတ်ကို ရှို့ပြီး “အလင်းဆောင်ကြ။အမှောင်ကို ခွင်းကြ။အာဏာရှင်စနစ်ကို ပြာချကြ။အာဏာရှင်စနစ်အမှောင်တိုက်က တိုးထွက်ကြ။ရွှေရည်စိမ်ဒီမိုကရေစီနဲ့ မရောင့်ရဲဘဲ ဖယ်ဒရယ်ဒီမိုကရေစီ စစ်စစ်ရတဲ့အထိ မီးရှူးတန်ဆောင်ကို ထွန်းညှိထားကြ” ဆိုတဲ့ များပြားလှတဲ့ အဓိပ္ပါယ်တွေကို စိတ်ကမှတ်ပြီး “မီးတုတ် မီးတုတ် ရှို့ ရှို့” ဆိုတဲ့ ကြွေးကြော်သံကို ကျွန်တော်တို့ ကြွေးကို ကြွေးကြော်ရပါမယ်။

မီးတုတ်မရှို့ဘဲ သပိတ်ချည်း ဆွတ်မှောက်နေသရွေ့တော့ ကျွန်တော်တို့ဟာ ဖယ်ဒရယ်ဒီမိုကရေစီ နဲ့ အလှမ်းဝေးနေဦးမှာပါ။ တလက်စတည်း တို့ဗမာ အစည်းအရုံး သခင်တွေ ကြွေးကြော်ခဲ့တဲ့ “သူပုန် သူပုန် ထ ထ” ဆိုတဲ့ ကြွေးကြော်သံကိုပါ ဆက်ရှင်းချင်ပါတယ်။အခုဆို တရားမဝင်တဲ့ အာဏာသိမ်း စစ်ကောင်စီကို “စစ်သူပုန်” လို့ခေါ်နေကြသူတွေကို တွေ့ရပါတယ်။

ဒါက သိပ်ကို မှားပါတယ်။ သူပုန်ဆိုတာ မတရားမှုကို တော်လှန်ပုန်ကန်တဲ့ သဘောနဲ့ ခေတ်အဆက်ဆက် သုံးခဲ့ကြပါတယ်။ဆရာစံ ဟာ သူပုန် ပါ။သခင်အောင်ဆန်း ဟာလည်း သူပုန်ပါ။ သပိတ်မှောက်ကျောင်းသား သူပုန် ကျောင်းသား စတဲ့ အသုံးအနှုန်းတွေကို ကြည့်ရင်လည်း သိနိုင်ပါတယ်။ဒါပေမဲ့ စစ်ကျွန်ပညာရေးစနစ်ရဲ့ အလိမ်အညာအောက်မှ ကြီးပြင်းခဲ့ရတဲ့ မျိုးဆက်တခုအနေနဲ့ သူပုန်ဆိုတာ “ပြည်သူ့အစိုးရကို တော်လှန်နေတဲ့သူ ၊မတရားတဲ့သူ”တွေ အနေနဲ့ ရှူမြင်ပြီး အောက်တန်းစား အာဏာသိမ်းစစ်ကောင်စီကို “စစ်သူပုန်”လို့ မှားယွင်းခေါ်ဝေါ်နေကြပါတယ်။ပညာရေးစနစ်အမှားအောက်က ကြီးပြင်းခဲ့သူတွများပြီး သူပုန် ရဲ့ အဓိပ္ပါယ်တောင် မသိတဲ့သူတွေကြားမှာ “သူပုန် သူပုန် ထ ထ “ဆိုတဲ့ ကြွေးကြော်သံကိုတော့ ကျွန်တော် မကြွေးကြော်ရဲသေးပါ။

အဆုံးသတ်အနေနဲ့ 

“ရန်မလိုလျှင် ရန်ပိုသည် ရန်လိုမှ ရန်ပြိုသည်။” လို့ အစဉ်အလာကို တော်လှန်ပြီး ရဲရင့်ခဲ့ကြတဲ့ နောင်တော်ကြီးများရဲ့ အရှက်ကို မခွဲဘဲ၊

“လာမဲ့ဘေး ပြေးတွေ့” “သခင်ပေါက်စ ထောင်ခြောက်လ” “မြင်းခွါတချက်ပေါက်ရင် ဗမာပြည်ကြီး မီးဟုန်းဟုန်းတောက်ရမည်” လို့ မကြောက်မရွံ့ ပြောဆိုသွားကြတဲ့ နောင်တော်ကျောင်းသားတွေ သခင်တွေရဲ့ မျက်နှာကို အိုးမဲ မသုတ်ဘဲ

“သပိတ် သပိတ် မှောက် မှောက်”

“မီးတုတ် မီးတုတ် ရှို့ ရှို့”

“သူပုန် သူပုန် ထ ထ “

“အရေးတော်ပုံ အောင်ပါစေ”

ဆိုတဲ့ ကြွေးကြော်သံများကို ရဲရဲဝံ့ဝံ့ ကြွေးကြော်ပြီး “သူတို့အကွက်” များကို ပညာဟူသော မီးတုတ်ကြီးကို ရှို့ ၊သပိတ်ကိုမှောက်၍ သူပုန် ထ ကာ ရှောင်ရှားနိုင်ကြပါစေကြောင်း.........ကြွေးကြော်သံတွေကို အဓိပ္ပါယ် ပြည့်ပြည့်ဝဝသိပြီး ရဲရဲကြွေးကြော်စေချင်တာကြောင့် အဆင်ပြေရင် share ပေးကြပါဗျ။

#သပိတ်မှောက်

#မီးတုတ်ရှို့

#သူပုန်ထ

#အရေးတော်ပုံအောင်ပါစေ

#day28