အရမ်းကောင်းလွန်းသည့်အတွက် ဦးရဲထွဋ် ရဲ့ FB မှ ကော်ပီ ယူပါသည်              မိတ်ဆွေတွေ ရန်မဖြစ်ကြပါနဲ့

နိုင်ငံရေး အခြေအနေ ရှုပ်ထွေးတင်းမာမှုတွေက လူမှု အသိုင်းအ၀န်းကြားကိုပါ ကူးစက်လာတယ်။ ပုဂ္ဂိုလ်ချင်း ဆက်ဆံရေးမှာ သူ့ဘက် ကိုယ့်ဘက် ကွဲပြီး မခေါ်နိုင်၊ မပြောနိုင် ဖြစ်တာလည်း ကြား ရတယ်။ ဖေ့စ်ဘွတ်မျက်နှာစာမှလည်း မိတ်ဆွေ စာရင်းထဲက ထုတ်ပစ်မယ်၊ ထုတ်ပစ်လိုက်ပြီ လို့ ကြွေးကြော်တာလည်းမြင်ရတယ်။ ပရိုင်ဖိုင်း မပြောင်းလို့၊ ပရိုဖိုင်းပြောင်းလိုက်လို့ ဆိုပြီး ရန်ဖြစ် နေတာလည်း တွေ့ရတယ်။  

နိုင်ငံရေးအမြင်မတူတာနဲ့ မိတ်ဆွေဖြစ်လို့မရတော့ဘူးလား၊ နိုင်ငံရေး အမြင်မတူတာနဲ့ ရန်သူ ဖြစ်ရတော့မလား။ လွတ်လပ်ရေးရပြီးထဲက ကြုံခဲ့တဲ့ မြန်မာနိုင်ငံရဲ့ နိုင်ငံရေးပြဿနာအားလုံး ရဲ့ အရင်းခံ အကြောင်းတရားတွေထဲမှာ ငါ နဲ့မတူ ငါ့ရန်သူ ဆိုတဲ့ သဘောထားက အဓိက အချက် တစ်ခုအနေနဲ့ပါခဲ့တယ်ဆိုရင် မှားမယ်မထင်ဘူး။ 

ကျွန်တော့်ကတော့  ငါနဲ့မတူ ငါ့ရန်သူလို့ သဘောမထားသင့်ဘူး။  ကိုယ့်အကြောင်း အကောင်းပြောမယ့်သူ၊ ကိုယ့်အဖွဲ့အစည်း ဘာလုပ် လုပ် ထောက်ခံမယ့်သူ၊ ကိုယ်နဲ့ အယူအဆ ထပ်တူကျတဲ့သူတွေ နဲ့ပဲ မိတ်ဆွေဖွဲ့ထားမယ်၊ သူတို့နဲ့ ပဲ စကားပြောမယ်ဆိုရင် အသံလုံခန်းထဲမှာနေတဲ့သူလိုပဲ အခြားအသံတွေမကြားနိုင်တော့ဘူး။ ရှုထောင့်ပေါင်းစုံကနေ ခြုံငုံစဉ်းစားနိုင်မယ့်အခွင့်အရေးကိုလက်လွတ်သွားမယ်လို့ ခံယူတယ်။ 

ကျွန်တော်တို့ကို မျက်စိနှစ်လုံး၊ နားနှစ်ဘက်ပေးထားတာကိုက ဟိုဘက်၊ သည်ဘက် စကားတွေ၊ လုပ်ဆောင်ချက်တွေကို မြင်နိုင်၊ ကြားနိုင်ဖို့ဖြစ်ပါတယ်။  ပါးစပ်တစ်ပေါက်၊ လ ျှာတစ်ချောင်း ပဲပေးထားတာက  ဘက်စုံနားထောင်လေ့လာသုံးသပ်ပြီးရင် ကိုယ်ယုံကြည်တာကို ခိုင်ခိုင်မာမာ ပြောနိုင်ဖို့ ဖြစ်ပါတယ်။ 

ဒ့ါကြောင့် ဖေ့စ်ဘွတ်မှာရော၊ ပြင်ပမှာပါ  ကျွန်တော့်မိတ်ဆွေတွေထဲမှာ  လူတန်းစား အလွှာစုံကပါသလို လူမျိုး၊ ဘာသာ ပေါင်းစုံပါတယ်။ တပ်မတော်၊ ဌာနဆိုင်ရာ၊  တိုင်းရင်းသား လက်နက်ကိုင်အဖွဲ့၊ နိုင်ငံရေးပါတီ၊  အင်န်ဂျီအို စတဲ့ အဖွဲ့ အစည်းမျိုးစုံက မိတ်ဆွေတွေရှိတယ်။

 ဖေ့စ်ဘွတ်မှာဆိုရင်  မိတ်ဆွေအများစုက ဒေါ်အောင်ဆန်းစုကြည်နဲ့ အင်န်အယ်လ်ဒီပါတီကို ထောက် ခံသူတွေပါ၊ အင်န်အယ်လ်ဒီ လွှတ်တော် ကိုယ်စားလှယ်တွေတောင်ပါသေးတယ်။ ဦးသိန်းစိန်အစိုးရ နဲ့  တပ်မတော် အမျိုးမျိုးဝေဖန်ရေးသားနေသူတွေ၊ လှောင်ပြောင်သရော်သူ တွေလည်းရှိတယ်။  တစ်ချို့ ဆိုရင် စိတ် အချဉ်ပေါက်တဲ့အခါ ကျွန်တော့်ကိုတောင် ငါနဲ့ ကိုင်တုတ် ပြီး ကွန်မန့် ရေးခဲ့ ဖူးတယ်။ 

အဲဒီလို နိုင်ငံရေးအမြင်မတူပေမယ့် ကျွန်တော့်မိတ်ဆွေတိုင်းမှာ ကျွန်တော်လေးစားတဲ့အချက်၊ သူ တို့ ဆီက  လေ့လာသင်ယူနိုင်တဲ့အချက်တွေရှိတဲ့အတွက် သူတို့ နဲ့ မိတ်မပျက်ခဲ့ဘူး။ သူတို့ ယုံကြည်တာ ကို ပြောင်းလဲပစ်ဖို့မကြိုးစားသလို ကိုယ့်ယုံကြည်ချက်ကိုလည်း မပြောင်းပါဘူး။ တူတာတွဲလုပ်၊ မတူတာခွဲလုပ်လို့ပဲ သဘောထားတယ်။

ဒါ့ကြောင့် နိုင်ငံရေးအမြင်မတူတာနဲ့ လူမှုပတ်၀န်းကျင်တစ်ခုလုံးကို နှစ်ခြမ်းမခွဲလိုက်ကြပါနဲ့ ၊ တစ်နိုင်ငံလုံးမှာ ဒီမိုကရေစီထွန်းကားအောင်မလုပ်နိုင်ရင်တောင် အနည်းဆုံး ကိုယ့်ဖေ့စ်ဘွတ်  မျက်နှာစာလေးမှာတော့ ဒီမိုကရေစီရဲ့ အခြေခံသဘောတရားဖြစ်တဲ့  မတူကွဲပြားမှုတွေကို လက်ခံနိုင်အောင် ကြိုးစားကြည့်ဖို့တိုက်တွန်းချင်ပါတယ်။  

#yehtutarticle

#Politics

#StateofEmergency